Mar 4 | ASO | STEP | Izesu' noso ohuno gahevela mino gohi mono' api' ogo nolo-ngimivo evene' muki' goloso igi di gese' adi'mo aza nene nosou' minine' sipi mau' vo dizo minavo di gese' ave muki' ingine noso gahevela gepelo' minani'.

Mark 4

Zuho Nite' Tile' Oga' Ive'mi Aneza Gamazi

(Mataio' 13:1-9; Luka' 8:4-8)

1 Izesu' noso ohuno gahevela mino gohi mono' api' ogo nolo-ngimivo evene' muki' goloso igi di gese' adi'mo aza nene nosou' minine' sipi mau' vo dizo minavo di gese' ave muki' ingine noso gahevela gepelo' minani'. 2 Nizavo aneza gamazi ato ato' lo-ngeme'mo novo inite' mukikumu' apize ngimine'. Noapize ngemo gamazi ma ti' lo lo-ngimine': 3 Gililo. Ve ma zuho inite' tile' oga' iveli'mo zuho nite' tile' olosa vine'. 4 Vo tile' o'mo novivo zuho nite' linge ma nene akalo' di'mozikevo namalite igi nani'. 5 Linge ma nene gehedo' misubo naba minamido' di'mozi misubo naba nomine' ne'mo geti' geti gala ho'li dizani'za 6 ho' nene amuzo molo lavo dizi luhive vai' damani' nenako ne'mo gulugulu izani'. 7 Linge ma nene gasava guvise hukikevo luhive ma ha minido' di'mozi gala ho'li dizani'za gasava guvise ne'mo dizo molo-ngedavo gihile izamani'. 8 Ido' linge ma misubo lamineku' di'mozi gala ho'li dizi gihile izani'. Ma ne'mo gihile teoti (30) izine'. Ma ne'mo gihile sigisiti (60) izine'. Ma ne'mo gihile vanu hadeti (100) izine'. 9 Ne'mine losa ti' lo line': Gatine ngolo' live nii ma nene gili lamine' ilo.

Izesu' Aza Aneza Gamazivo' Laa' Ine' Nemu' Monovo Lo-ngimine'

(Mataio' 13:10-17; Luka' 8:9-10)

10 Evene' muki' ingine hutile' igi vikevo izipahala zuho tuvelu inginesi ido' ezesi monaa' ave linge masi engikovo' mini aneza gamazi laa' ine' monovo mamu' longo' i-dikevo 11 ti' lo lo-ngimine': O'moso'mo gizebo o-ledelingumu' suno' gamazi nene lengi' ha gililisave lavo lo soto' o-lengemaa' nouvoni'za lelikisi monamaa' ave nene aneza gamazivo' lo-ngemaa' nouve. Ne'mine nouvoni' nene polohete mali'mo gizine' gamazi ma nene inginela gihile izelive losa ne'mine oga' nouve. Ti' lo gize neive:

12 Ningi ningi ningilizaha ninge lamine' amilisave.
Ido' gili gili gililizaha gili lamine' amilisave.
Nene nanitekumu' ve. Ingine lu'ine di velepe' izikevo
O'moso'mo lihime'ine hulo-ngedalive losa ve.

Zuho Nitekumu' Aneza Gamazi line' Ne'mi Monovo Lo-ngimine'

(Mataio' 13:18-23; Luka' 8:11-15)

13 Ne'mine lo ti' lo lo-ngimine': Aneza gamazi luvoni' me'mi monovo gilamahe. Ido' gilamilizani' nene aneza gamazi muki' nene nadi' igi gililizave. 14 Zuho nite' tile' oga' ive aza O'moso'mi gamazi nene tile' oga' neive. 15 Ido' gihile ma akalo' do'mozive luvoni' ne'mi monovo nene ne'mino neive: O'moso'mi gamazi nene evene' maliti lu'ningu' tile' ogavo nigilavo Satani'mo geto ogo a'mine gamazi nene lu'ninguti' ipe' ogo do vaa' neive. 16 A'mine'mine ogo gihile ma gehedo' misubo naba minamido' di'mozave luvoni' ne'mi monovo nene ne'mino neive: Evene' ma ingine O'moso'mo gamazi've tile' ine' nene gilii lite' li gili lanite' igi di go'zaa' naha 17 a'mine gamazi ne'mo lu'ningu' luhise do minelido' mini mili minamavo gamene ha'namu' gili dii minisa'mave. Ido' gamene ha'na gili di minisa'mani' nene ingine a'mine gamazi gili nidavo ne'mo engita geni soto' o-ngemelihe goboni mala' mala' soto' o-ngemelihe. Ine' nene geti hulaa' nave. 18 Ido' gihile ma gasava guvise minido' di'mozave luvoni' ne'mi monovo nene ne'mino neive: Evene' ma ingine O'moso'mo gamazi tile' ine' nene ha gilani'za 19 ingine oko'ine losuvo'mi initekumu' gilaa' ido' moni henenimu' gahu'ningu' oga' ido' ato ato' nite' muki' nene dalone li gilaa' ani' ne'mo nene dizo O'moso'mi gamazi nene molo-davo gihile izesa'mive. 20 Ido' gihile ma misubo lamineku' di'mozave luvoni' ne'mi monovo nene ne'mino neive: Evene' ma ingine O'moso'mi gamazi gili lu'ningu' di go'zi gili lamine' igi nizavo gihile izaa' neive. Ee, zuho nite' hamototi' gihile teoti (30) izaa' neine' ne'mino ve mala nene muki' izaa' neive. Ido' zuho nite' hamototi' gihile sigisiti (60) izaa' neine' ne'mino ve mala nene vai' goloso izaa' neive. Ido' zuho nite' hamototi' gihile vanu hadeti (100) izaa' neine' ne'mino ve mala nene vauve goloso elosa izaa' neive.

Lamu Gizakumu' Aneza Gamazi

(Luka' 8:16-18)

21 Ne'mine lo ti' lo lo-ngimine': Lamu ma gizi misubo somodunu' molo hitelone li ido' holomoli'mi sebengu' haleko molalone li di igi milaa' nahe. Ne nomive. Lamu gizii labana' elo minelido' holomo'velo' molalone li di igi milaa' nave. Olo. 22 A'mine'mine ogo inite' ma suno' mineline' nene mudise ningamavo ma minamoloseive. Mo soto' oloseive. Ido' inite' ma hito mineline' nene ningilizada omo soto' oloseive. 23 Gatine ngolo' live nii ma gili lamine' ilo.

24 Ido' gamazi ne'minosasi ma lo-ngimine': Gamazi ma li-lingimikevo nigili ma nene gatine mili mini a'minguti' ho'li gilisa minilo. Lingine igi mili minilizani' votigilelo' nene do molo O'moso'mo hize ele' o-lengedo gohi masi imine' molo-lengedeleseive. 25 Ee, mono' ma do nolive nene O'moso'mo gohi ma emeleseive. Ido' mono' ma damo nolive nene eita mono' ngomosi ma noline' nene mo ipe' ogo do voloseive.

O'moso'mo Evene'velo' Gizebo Oga' Neine' Ne'mo Naba Iline' Aka've Laza Ningamunivo Naba Oga' Neine' Nemu' Aneza Gamazi Lo-ngimine'

26 Ido' gamazi gohi ma ti' lo lo-ngimine': O'moso'mo evene'velo' gizebo iline' nene ne'mine o'mo vo nabau' voloseive: Ve mali'mo zuho nite' mi'veu' tile' ogosa 27 liti'muso izo go' lo neivo aza ongo oto o'mo novivo zuho nite' nene gala ngolo' lo dizine'. Dizine'za ne'mi monovo nene aza ningo gelamine' ve. 28 Misubo ne'mo asi've do dize-daa' neive. Api' ogo gala ngolo' lo avile ogo gihile izaa' neive. 29 Ne'mine ogo gihile husavo ma aza huko dalone' gamene alitave lo gelo goboni ve vi hukilizave lo ngimiselaa' neive.

O'moso'mo Evenelelo' Gizebo Iline' Nene Vo Naba Ilingumu' Izesu' Aza Sakave' Naba'mine Ma Minidi'mi Zuholo' Lo Molo Aneza Gamazi lo-ngimine' Gamazi

(Mataio' 13:31-32, 34; Luka' 13:18-19)

30 A'mine gamazilo' gohi ma imine' molo ti' lo lo-ngimine': O'moso'mo evene'velo' gizebo iline' vo naba iline' aka've nene laza nado neive lolone. Ido' inite' naniteto' lo molo lokunivo vo milise' ilive. Ido' inite' naniteto' aneza gamazi lo molo lolone. 31 A'mine O'moso'mi gizebo nene naba'mine sakave' zuho ne'minosa neive. A'mine nite' nene me misubouko minani' zuho nite' vaikuti' ei' nene ngomo lasolo neine'za 32 zuho' ikevo gala ho'lo dizo mingu' nite' muki' nene ngivile' ogo naba ogo a'nava've nene naba ogo zamu' gizavo nama nete igi a'mingu' numuno gizaa' nave lo line'.

33 Ido' ne'mine aneza gamazi ato ato' muki' nene mono' ha gililizadokovo' lo-ngemo minine'. 34 Evene' muki' nene aneza gamazivo' lo-ngimine'za alinge' azasi izipahala zuhosi angisevo' minangu' nene gamazi monovo muki' nesi nene lo soto' ogo lo-ngemaa' ine'.

Izesu' Lavo Hepe' Naba Matavo Noso Nene Zou Lo Minine'

(Mataio' 8:23-27; Luka' 8:22-25)

35 A'mine gameneu' nene nivenga' molavo Izesu' aza izipahala zuho ti' lo lo-ngimine': Noso helala holene volone. 36 Lavo evene' muki' di gese' igi minave nene huli-ngidi sipiu' nene ha minidokovo' ha neivo ingine ele'mizi vani'. Nivavo sipi gohi masi maka' vani'. 37 Nivavo hepe' naba goloso elavo ne'mo noso nene golo gidini dizevo' dizevo' ogo sipi nene hito lulouko velo leme' leme' idi'mo sipiu' nene noso'mo vai' lolosa ine'. 38 Ne'mine ogo neivo Izesu' aza nene sipi isevela godololo' alese molo okise ongo minine'. Minavo izipahala zuho ingine u'muko' igi ti' li lani': Tisazo, laza nosou' mene lemo heleloningumu' nene ma gelamabe. Olo. 39 Ne'mine likevo aza oto hepe' nene elemo noso mamu' moda ve. Hongu lozo line'. Lavo hepe' nene matavo noso nesi hongu lo zou lo minine'. 40 Ne'mine ogavo ti' lo lo-ngimine': Lingine golise nanimu' nigilave. O'mosomu' gili ele'vole' amahe. 41 Ti' lo lavo ingine ngehelele goloso izavo a'minemu' li volelo' melo' igi ti' li lani': Mene ve nene nani'mine ve neivo hepeki nosogi nene gamazi've gili dikesive.